وهكذا حالى مع الطب ....

بعنوان " نسي الفوطة "

ناس واقفه بتتريأ ومبسوطة
وناس تانية بتستغرب ومنقوطة ، ليه الدكتور نسي الفوطة
وهو يا عيني كان واقف ووشه أحمر ولا القوطة

و قال ياجــــــــماعه سامحوني ....وقبل ما تيـــــــجوا تلوموني
تعالــــــوا أحكيلكوا أنا حكايتي..... وبعديها إبقوا حـــــــاكموني

سنــــين فــــاتت في ثانــــــويه..... كفاح دامي وعــرق ودموع
وبعد المعركـــــــــه الحــــاميه..... قدرت أنجح وأجيب مجموع

أخيراً حلمنـــــــــــــــــا إتحقق .....هخش الطــــــــب وأدّكــــتر
رســـــــــــاله جميله ومعـــاها...... مقام عالي وفلوس أكـــــــتر

و جاتلي بطاقة الترشيـــــــــح...... فيها الطب اللي بحــــــلم بيه
بتاع البوسته جابهــــــــــــالي ......وخدله حلاوه عشــــرة جنيه

في أول يوم لـــــــــبست جديد ......وشلت البالطو رحـت لاقيت
زمايلي إتحــشروا في مــدرج...... عامل ولا عــــــلبة الكبريت

ولكــن برضه مايئستش

دخل دكتور قعد يشــــــــــرح .......كلام كــــان صعب ولاتيني
و أنا متنـــح ومـــش فــــــاهم ......لاقيت النــــــــوم غلب عيني
ولكــن برضه مايئستش
و قلت مادام ضــــاع النظري...... هظبّــــــــط نفسي في العملي
جريت عـ المشـــرحه بسرعه...... لكن كالـــــــــعاده خاب أملي

دخلـــــت لاقـــيت 200واحد....... بيتخــــــــانقم على الجــــــثه
وناس واقـــــــــفه من الزحمه ......على كتافـي ومـــــــش حاسه

ولكــن برضه مايئستش

و طبــــــعاً حسّوا بظــــروفنا .......وحطّولنا إمتــــــحان فوازيــر
وكل أمّا آجي أحــل ســـــؤال....... أقف أدامــــــه زي الــــــزير

ولكــن برضه مايئستش

وجينا في لجنة الشـــــــــفوي....... وكان أدّامي واد كــــــــــوسه
خد الـfull mark مـ الدكتور....... وخد فوقهـم كــمان بوسه

ولكــن برضه مايئستش

دخلت انا قام مكـشرّلي .......كأنّ أنــا مش human race
سألني سؤال.. ماردّيتشي........وقاللي أخرج ياhopless case

ولكــن برضه مايئستش

سنه بتمشــي وســــنه بتيجي ........مقـــالـــب بعـــدها مقـــالب
زمايلي إتعينوا و قبـــــــضوا .......و أنا شايـــــل لـــــــقب طالب

ولكــن برضه مايئستش

كبـــــــرنا شـــويه وقــــالولنا....... خلاص دلوقتي شوفوا حالات
و رحنـــــــا نشوف وكالعاده........ دا كله بيطلع إشتــــــــــغالات

ولكــن برضه مايئستش

بشوف الشاب من ســــــــني........ واقـــــــــف ويّا الصحاب مرتاح
و لــــو عديـــــت أنا يقولــوا........ راح الدحّـــاح .....جه الدحّـــاح

ولكــن برضه مايئستش

لحد ماخلصم السبــــــــــــعه ........وقلت خلاص هروق وهعيش
و قبل ما أفوق من الصــدمه........ خدوني عشان أخـــش الجيش
ولكــن برضه مايئستش

وقعت هناك في إيــــد ظابط ........ظغرلي وقال يا بســـــــــكوته
أحب أبـــــــــــشرك إنــــــك ........معـــــــايا هتطـــــــفح الكوته

ولكــن برضه مايئستش

خلااااص السبعه بقوا عشرة........ ولسه أنا ماشي جنــب الخيط
و بان السن علــــــــى وشي ........و شعري إبيـــّض و إصلعيت

ولكــن برضه مايئستش

وبعد ما قـــــلت كــــــــفاره ........خلاص هرتاحلى بقى كام يوم
لاقيتهم تـــــــــانــي واخدنّي .......عشان تكليـــــــــفي في السلوم

ولكــن برضه مايئستش

و قلت هنـــاك هآخد قرشين........ آكل منهم و أجيـــــــــب لبسي
فوجئـــــــت يا عيني بمرتب .......يادوب مايقضــــــنيش شيبسي

ولكــن برضه مايئستش

و بعد الـــعمر دا كـــــــــــله .......رمــــــوني في وحـــده صحية
نسيت الطب أنا فيــــــــــها ........وبقــــــــيت زي التمــــــرجية

ولكــن برضه مايئستش

و آديني بعيش وهعمل أيـه؟؟........ ماليــــــــش ولا قوه ولا حولا
وحيد غلبان وحتى مافــيش ........جــواز علـــى نفــــقة الدوله

ولكــن برضه مايئستش

قام الدكتور صعب عـ الناس....... و فــــــضلم يـــبكوا على حاله
و حتى الفوطة نســــــــيوها........ ولموا فلــــــــــوس وسابوهاله
و قال دكتورنا عـ الفوطــــه........ تعــــــالوا هشـــــيلها أنا بكرة
لكن اهل المريض قالــــــوا........ خلاص........ سيبهالنا للذكرى